የአባይ ወንዝ ተፈጥሯዊ አቅጣጫ ዛሬ በይፋ ተቀየረ።

(ባሃሩ ይድነቃቸው)

ለታላቁ የኢትዮጵያ ህዳሴ ግድብ ግንባታ አመቺነት የአባይ ወንዝን ተፈጥሯዊ አቅጣጫ የማስቀየር ስራ ሲከናወን ቆይቷል ።

ይህ ስራ ተጠናቆ ዛሬ ወንዙ በይፋ ተፈጥሯዊ አቅጣጫውን ቀይሯል ።

የወንዙን ተፈጥሯዊ አቅጣጫ የማስቀየሩን ተግባር ይፋ ለማድረግ በተዘጋጀ ስነ ሰርዓት ላይም የተገኙት የኢፌዴሪ ምክትል ጠቅላይ ሚኒስትርና የትምህርት ሚኒስትር አቶ ደመቀ መኮንን እለቱ አባይን በፈለግንበት መስመር የምናስኬድበት ቀን ብለዋል ።

“ስር በሰደደ ድህነታችን ምክንያት በፈለግነው ሳይሆን እሱ ባሰኘው መንገድ ሲፈስ ቆይቷል” ያሉት አቶ ደመቀ ፥ “አሁን አባይን በመዳፋችን ውስጥ እንዲገባ አድርገናል” ነው ያሉት ።

አባይ እጣ ፈንታው በእጃችን እንዲሆንና በታሪካችን ለመጀመሪያ ጊዜ እኛ በመራንበት እንዲጓዝ ማድረጋችን የኢትዮጵያንና የአፍሪካን ህዳሴ የሚያመላክት መሆኑንም ተናግረዋል ።

እንደ አቶ ደመቀ ንግግር እለቱም ከግንቦት 20 ጋር መገናኘቱም ልዩ ትርጉም ያለው ይሆናል ።

በዚህ ታሪካዊ እለት ከአገሪቱ ማህፀን ፈልቆ ኢትዮጵያን የበይ ተመልካች ያደረገው አባይ በኢትዮጵያ መዳፍ ላይ መውደቁ እለቱን የድርብርብ ታሪክ ባለቤት ያደርገዋልም ነው ያሉት ።

ምክትል ጠቅላይ ሚኒስትሩ እንዳሉት ፥ የዚህ ታላቅ ፕሮጀክት ጠንሳሽ አቶ መለስ ዜናዊ የተሰዉለት ዓላማ የጠራ መሆኑንና የመላውን ህዝብ ድጋፍ ማግኘቱንም ያረጋገጠም ሆኗል ።

አገራዊው ደስታ ሙሉ የሚሆነው ግድቡ ስራ ሲጀመር በመሆኑም ህዝቡ ድጋፉን እንዲቀጥል ጠይቀዋል ።

በግድቡ ግንባታ ሂደት አራት አበይት ክንውኖች አሉ ያሉት የኢፌዴሪ የውሃና ኤኔርጂ ሚኒስትር አቶ ዓለማየሁ የተገኑ ደግሞ ፥ ዛሬም በይፋ የተከናወነው የወንዙን ተፈጥሯዊ አቅጣጫ የማስቀየር ስራ አንዱ ነው ብለዋል ።

የወንዙ ተፈጥሯዊ አቅጣጫ መቀየር የአይችሉም አመለካከትን በከፍተኛ ደረጃ የሚያከስምና ኢትዮጵያ ወንዙን ማልማት እንደምትችል የሚያሳይም ነው።

አቅጣጫውን ማስቀየር ለምን አስፈለገ ?

ወንዙ የሚገኘው ግድቡ በሚገነባው መሃል ላይ ሲሆን ፥ ወንዙ እየፈሰሰ ግድቡን መገንባት የማይቻል በመሆኑ ነው ተፈጥሯዊ አቅጣጫውን ማስቀየር ያስፈለገው ።

አቅጣጫ የማስቀየሩ ስራ በግንብታው ሂደት አስቸጋሪ ስራ መሆኑን የሚናገሩት የኢትዮጵያ ኤሌክትሪክ ሀይል ኮርፖሬሽን ዋና ስራ አስፈፃሚ አቶ ምህረት ደበበ ፥ ስራውም እጅግ ከፍተኛ ጥረት ውጤት መሆኑን አመልክተዋል ።

የግድቡ ፕሮጀክት ዋና ስራ አስኪያጅ ኢንጂነር ስመኘው በቀለ በበኩላቸው ፥ የወንዙን አቅጣጫ የማስቀየሩ ስራ ከተያዘለት ጊዜ በሁለት ሳምንት ቀደም ብሎ መጠናቀቁን በመጠቆም ይህ ስራዎች ከተያዘላቸው ጊዜ ቀደም ብለው በፍጥነት እየተከናወኑ መሆናቸውን እንደሚያሳይ ነው ያመለከቱት ።

በአሁኑ ወቅትም የታላቁ የኢትዮጵያ ህዳሴ ግድብ ግንባታ 21 በመቶ መጠናቀቁ ተመልክቷል ።

*************

Source: Fana – May 28, 2013, titled “አባይ ተፈጥሯዊ አቅጣጫውን ቀየረ”.